06, მარტი 2017 20:14:00
შპს „ჰიგიენას“ ყოფილი ხელმძღვანელი, ირაკლი ცეცხლაძე დააკავეს - ინფორმაციას საქართველოს ფინანსთა სამინისტროს საგამოძიებო სამსახური ავრცელებს. ირაკლი ცეცხლაძეს საგამოძიებო სამსახური განსაკუთრებით დიდი ოდენობით, სახელმწიფო ბიუჯეტის კუთვნილი თანხის მართლსაწინააღმდეგოდ მითვისებას ედავება. საქმეზე მიმდინარეობს გამოძიება საქართველოს სისხლის სამართლის კოდექსის 182-ე მუხლის მე-2 ნაწილით რაც სასჯელის სახით თავისუფლების აღკვეთას 7-დან 11 წლამდე ვადით ითვალისწინებს. აჭარის ფინანსთა და ეკონომიკის სამინისტროს მიერ დაფუძნებული, შპს „ჰიგიენას“ ყოფილი ხელმძღვანელი მას შემდეგ იძებნებოდა, რაც კომპანიის ანგარიშზე არსებული, არაოფიციალური ინფორმაციით 5 მილიონი ლარის მითვისებაში დასდეს ბრალი. აღნიშნული თანხა ქობულეთში თანამედროვე ნაგავსაყრელის მშენებლობაზე უნდა დახარჯულიყო. ბრალდებას არ ეთანხმებიან დაკავებულის ახლობლები. მათი მტკიცებით ირაკლი ცეცხლაძეს თანხა არ მოუპარავს და მას ბრალს უკანონოდ სდებენ.