კორონავირუსის საწინააღმდეგო ვაქცინაცია და საინფორმაციო შეხვედრები, აჭარის სოფლების გარდა, აქტიურად მიმდინარეობს მსხვილ ორგანიზაცია/დაწესებულებებში. დღეს, ვაქცინაციის პროცესი და საინფორმაციო შეხვედრა შპს ბათუმის ავტოტრანსპორტში გაიმართა.

COVID-19-ის იმუნიზაციის აუცილებლობისა და უპირატესობის შესახებ, ორგანიზაციის თანამშრომლებს ესაუბრნენ აჭარის ჯანდაცვის მინისტრის მოადგილე, მარი ზანაქიძე და დაავადებათა კონტროლის ეროვნული ცენტრის აჭარის სამმართველოს ხელმძღვანელი, ნინო გუგუშვილი.

შეხვედრა ინტერაქტიულ ფორმატში წარიმართა, შეხვედრის მონაწილეებს შესაძლებლობა ჰქონდათ მათთვის საინტერესო კითხვებზე პასუხები ამომწურავად მიეღოთ, შეხვედრის დასასრულს კი ვაქცინაცია ადგილზე ჩაეტარებინათ.

„ბოლო დღეების განმავლობაში, აჭარაში ვაქცინაციის ტემპი საკმაოდ გაიზარდა, თუმცა ეს არ არის საკმარისი სასურველი შედეგის მისაღწევად. რეგიონში აქტიურად მიმდინარეობს საინფორმაციო კამპანია როგორც სოფლად, ასევე ქალაქში, სხვადასხვა მსხვილ საწარმოში. დღეს, ბათუმის ავტოტრანსპორტში ვაქცინაციის შესახებ ჩავატარეთ საინფორმაციო შეხვედრა მიზნობრივ ჯგუფებთან, რომლებიც ჯერ კიედევ არ გახლავთ აცრილები. პარალელურად ჩატარდა ვაქცინაცია პროტოკოლის სრული დაცვით“, - განაცხადა მინისტრის მოადგილე, მარი ზანაქიძემ.

ამჟამად, აჭარაში ჩატარებული 248 741 დოზა ვაქცინა. I დოზით აცრილია მოსახლეობის - 38.2 %, 18 წელს ზემოთ ასაკის - 50.1 %. II დოზით ვაქცინირებულია მოსახლეობის - 31.6 %, 18 წელს ზემოთ ასაკის - 41.4 %.

Tags:

გაზიარება

3