23, ნოემბერი 2021 18:44:00
2003 წლის, ვარდების რევოლუციიდან 18 წლისთავზე ოპოზიციის მხარდამჭერებმა და სამოქალაქო აქტივისტებმა ცოცხალი ჯაჭვი შეკრეს. დღეს, მთელი დღის განმავლობაში დედაქალაქში 8 სხვადასხვა ლოკაციაზე საპროტესტო აქცია იმართებოდა. აქციებზე მოქალაქეებს სიმბოლურად, ვარდები და ევროკავშირის დროშები ჰქონდათ გამოტანილი.
მათივე თქმით, აქციით მათ კიდევ ერთხელ შეახსენეს ხელისუფლებას, რომ ეს დღე ახსოვთ.
აქციის მონაწილეების თქმით, თქმით, შსს-ს რუსთაველის გამზირის გადაკეტვის თხოვნით მიმართეს, თუმცა, უწყებამ ეს თხოვნა არ გაითვალისწინა - ჯაჭვი მანქანების მოძრაობის ფონზე შეიკრა.
ცნობისთვის, ვარდების რევოლუცია 18 წლის წინ, 2003 წლის 23 ნოემბერს მოხდა. 2003 წლის 2 ნოემბრის არჩევნების შემდეგ ქვეყანაში მასშტაბური გამოსვლები დაიწყო, რაც 23 ნოემბერს მაშინდელი საქართველოს პრეზიდენტის, ედუარდ შევარდნაძის გადადგომით და ხელახალ არჩევნებით დასრულდა.