მას შემდეგ რაც თვითმმართველობის პირველი ტურის შედეგები გამოცხადდა, ექსპრემიერის გუნდი არ ასაჯაროვებდა, წარმომადგენლობის ორგანოში, ოპოზიციური სპექტრის ინტერესებს გაატარებდა თუ მმართველი გუნდისკენ გადაიხრებოდა. პარტიამ, რომელიც საკრებულოებში, გადამწყვეტი ხმის უფლებით სარგებლობს, დღეს განაცხადა, რომ რამდენიმე წარმომადგენლობით ორგანოში, თავმჯდომარედ საკუთარი კანდიდატურის დაყენებას გეგმავს. „ქართულ ოცნებას“ და „ნაციონალურ მოძრაობას“ კი მოადგილის პოზიციას სთავაზობს. კახაბერ ქემოკლიძის თქმით, ეს მათი მხრიდან, ქვეყნისა და მოსახლეობის საუკეთესო ინტერესებიდან გამომდინარე გადადგმული ნაბიჯია.
ოპოზიციაში ეჭვობენ, რომ ექსპრემიერის პარტია, მოლაპარაკებებს ხელისუფლებასთან აწარმოებდა. ამას კი იმით ხსნიან, რომ გახარიას გუნდს, საკრებულოში შესულ ხელისუფლების ოპონენტ პარტიებთან, ბოლო პერიოდში, კონსულტაციები, არ ჰქონიათ. ბათუმის საკრბულოში, თვითმმართველობის არჩევნების შედეგებით, პარტიიდან ''საქართველოსთვის'' სამი წევრი შევიდა. 29 ოქტომბერს, ბათუმის ორგანიზაციის თავმჯდომარე გახარიას გუნდს გამოეყო და წარმომადგენლობით ორგანოში, დამოუკიდებელი დეპუტატის სტატუსით მუშაობა დაანონსა. შესაბამისად, ოპოზიციაში უჩნდებათ კითხვა? როგორ უნდა დააყენონ თავმჯდომარეობის კანდიდატი, როცა კანონის მიხედვით კანდიდატურის წარდგენის უფლება, საკრებულოში, მინიმუმ სამი წევრით მოხვედრილ პარტიას აქვს.
დათანხმდება თუ არა ექსპრემიერის შეთავაზებას, „ქართული ოცნება“ მმართველი გუნდის წევრებს პასუხის გაცემა უჭირთ. გია ვოლსკი ამბობს, რომ ამ საკითხზე, თანაგუნდელებთან ჯერ-ჯერობით კონსულტაციები არ ჰქონია.
2021 წლის არჩევნების შედეგად, ''ქართულმა ოცნებამ'' უმრავლესობა 7 მუნიციპალიტეტის საკრებულოში დაკარგა: წალენჯიხის, ზუგდიდის, მარტვილის, ჩხოროწყუს, სენაკის, რუსთავის და ბათუმის. სწორედ ამ მუნიციპალიტეტების საკრებულოებში აქვს, გახარიას პარტიას, გადამწყვეტი ხმების მნიშვნელობა.
1
s
s
s