09, ნოემბერი 2021 15:43:00
სახალხო დამცველი აცხადებს, რომ მიხეილ სააკაშვილის N18 დაწესებულებაში მოთავსება ცალსახად არღვევს სახელმწიფოს მხრიდან ადამიანის ღირსების პატივისცემის ვალდებულებას. ომბუდსმენი მოუწოდებს ხელისუფლებას, ექსპრეზიდენტი დაუყოვნებლივ გადაიყვანონ ალტერნატიულ სამედიცინო დაწესებულებაში. ნინო ლომჯარიამ, მიხეილ სააკაშვილი პენიტენციური სამსახურის N18 სამკურნალო დაწესებულებაში გუშინ მოინახულა. ექსპრეზიდენტმა მას განუცხადა, რომ გადაყვანის შესახებ სწორი ინფორმაცია არ ჰქონდა და იგი მხოლოდ მულტიფუნქციურ სამოქალაქო კლინიკაში გადასვლას დათანხმდა. სახალხო დამცველის აპარატის წარმომადგენლები იმყოფებოდნენ N12 დაწესებულებაშიც, სადაც მისი თანხმობის შესახებ დოკუმენტი ვერ მოიპოვეს. განცხადებაში ასევე წერია, რომ გლდანის სასჯელაღსრულების დაწესებულებაში კომპიუტერული ტომოგრაფიის აპარატი სააკაშვილის გადაყვანის დღეს მიიტანეს და მისი დამონტაჟება უახლოეს პერიოდში იგეგმება. კონსილიუმის მოთხოვნის მიუხედავად, კი იქ ჯერ კიდევ არ არის მაგნიტო-რეზონანსული ტომოგრაფიის აპარატი და არ ფუნქციონირებს კათეტერიზაციის ლაბორატორია.