საქართველოში საწვავის ფასი ისტორიულ მაქსიმუმზეა. ერთი ლიტრი ბენზინი ახლა, 3 ლარი და 37 თეთრი ღირს. ქვეყანაში ბოლო ერთი წლის განმავლობაში, შავი ოქროს ღირებულება 2-ჯერ გაიზარდა. ექსპერტების პროგნოზით, ტარიფის ზრდა ისევ მოსალოდნელია. ისედაც გაღარიბებულმა მოქალაქეებმა კი, ბრენდირებულ ბენზინგასამართ სადგურებს ბოიკოტი გამოუცხადეს. რა სახელდება გამომწვევ მიზეზებად? სალომე უსტალიშვილი გიამბობთ.

კახა კალაძის წინასაარჩევნო შეხვედრა 2012 წლით თარიღდება, მაშინ, როდესაც საწვავის ფასი 1 ლარს და 33 თეთრს შეადგენდა. „ქართული ოცნების“ ახალბედა წევრი  ამომრჩევლის გულს მსგავსი დამაჯერებელი ფრაზებით ცდილობდა, თუმცა როგორც ჩავლილმა 9 წელმა აჩვენა, დაპირება ტყუილი აღმოჩნდა. ბენზინის ღირებულებამ არათუ დაიკლო, თითქმის 2 ლარით იმატა. დღეს რეგულარის საშუალო ფასი 3 ლარი და 9 თეთრია.

საქართველოში საწვავის ღირებულება ახლა ისტორიულ მაქსიმუმზეა. ბენზინი, ქვეყანაში, განსაკუთრებით, ბოლო რამდენიმე თვეა ძვირდება. „მდუღარე ეკონომიკის“ ფონზე, ხელისუფლებას ეს დიდად არ აწუხებს. გაზრდილი ფასები განსაკუთრებულ ტვირთად მძღოლებს აწევთ

„უარი საწვავის ფასებს“ - ამ სლოგანით, მძღოლებმა სოციალურ ქსელში კამპანია წამოიწყეს. ისინი შავი ოქროს გაზრდილ ფასებს აპროტესტებენ. ერთი იდეის ირგვლივ გაერთიანებულმა ადამიანებმა გადაწყვიტეს,  ბენზინგასამართ სადგურებს მონაცვლეობით ბოიკოტი გამოუცხადონ, ახლა ისინი უარს ვისოლის ბრენდზე ამბობენ. მძღოლების ნაწილს კი მიაჩნია, რომ  გამოსავალი მთავრობის ცვლილებაშია.

ნავთობიმპორტიორთა კავშირში, ფასების გაძვირებას საბითუმო ბაზარზე ფასნამატს უკავშირებენ. ისინი ფასების რეგულირებას უახლოეს მომავალში ვერ პროგნოზირებენ.

ბენზინის ფასი, ბოლო დროის ყველაზე რეკორდულ მაჩვენებელს აღწევს. სპეციალისტების შეფასებით, საწვავზე ფასის ზრდა უმძიმესად აისახება, არამხოლოდ მძღოლებზე, არამედ იმ ადამიანებზეც, რომლებიც ტაქსით ან საზოგადოებრივი ტრანსპორტით გადაადგილდებიან.

სუპერის, ანუ საუკეთესო ხარისხის საწვავის საშუალო ფასი ახლა, 3 ლარსა და 37 თეთრს შეადგენს. ევრო  დიზელის ღირებულება, სამი ლარი და 9 თეთრია. პრემიუმის ტიპის ბენზინი, სამი ლარი და 27 თეთრი.

Tags:

• ეკონომიკა
• მოსახლეობა
• საწვავი

გაზიარება

2