შესაძლოა ევროკავშირმა ბალკანეთის, ასევე აღმოსავლეთ პარტნიორობის ქვეყნებს - საქართველოს, მოლდოვას და უკრაინას ევროკავშირთან უვიზო მიმოსვლა შეუჩეროს. ამის შესახებ გამოცემა euobserver ევროკავშირის შიდა დოკუმენტის საფუძველზე წერს.
ევროკავშირთან უვიზო მიმოსვლის შეჩერების მიზეზად მოლდოვიდან, საქართველოდან და უკრაინიდან თავშესაფრის უსაფუძვლო მოთხოვნები და არალეგალების რიცხვის ზრდა სახელდება.
როგორც euobserver აღნიშნავს, უვიზო მიმოსვლის შეჩერების საკითხი საფრანგეთმა, იტალიამ და გერმანიამ წამოაყენა.
საქართველომ ევროკავშირთან უვიზო მიმოსვლის უფლება 2017 წელს მოიპოვა. ევროკომისია უვიზო მიმოსვლას პოსტსაბჭოთა ქვეყნების მნიშნველოვან მიღწევად მიიჩნევს.
მიუხედავად ამისა, euobserver წერს, რომ "სავიზო რეჟიმის შეჩერების მექანიზმის" საფრთხე ახლა აქტიურად განიხილება. იმისათვის, რომ ევროკომისიამ უვიზო მიმოსვლა შეაჩეროს, საჭიროა არალეგალური ცხოვრების და თავშესაფრის მოთხოვნების რიცხვი 50%-ზე მეტით გაიზარდოს.
ასევე, უვიზო მიმოსვლა შეუწყდება ქვეყნებს, რომლებიც თავიანთი მოქალაქეების უკან დაბრუნებაზე უარს ამბობენ.
ევროკომიის ანგარიშში ნათქვამია, რომ გერმანიაში, გასულ სამ თვეში, საქართველოდან თავშესაფრის მოთხოვნის რიცხვი, 2019 წლის შესაბამის პერიოდთან შედარებით 51%-ით გაიზარდა, მოლდოვიდან კი 429%-ით.
გერმანიის დელეგაციის თქმით, თუ ეს მონაცემები არ გაუმჯობესდება, უვიზო მიმოსვლის შეჩერება უფრო დაჩქარდება.
საქართველოდან და ალბანეთიდან ჩასული არალეგალებით და თავშესაფრის მთხოვნელთა რიცხვის ზრდით უკმაყოფილოა საფრანგეთი და ჩეხეთიც.
იტალია კი უკმაყოფილებას არალეგალების მოლდოვადან ზრდის გამო გამოხატავს. რომი ხაზს უსვამს, რომ მოლდოვადან შესაძლოა ადგილი ჰქონდეს ტრეფიკინგის შემთხვევებს და შესაბამისი ქსელების მუშაობას, რომლებიც "ბოროტად იყენებენ უვიზო მიმოსვლას".
მოლდოვადან არალეგალების ზრდას საგანგაშოს უწოდებს ბელგია. ბელგიისვე განცხადებით, არალეგალური ბინადრების რიცხვი გაიზარდა ჩრდილოეთ მაკედონიიდანაც, თუმცა, მათივე შეფასებით, ეს შესაძლოა დროებითი "ზაფხულის ფენომენი" იყოს.
ევროკომისია უვიზო მიმოსვლის შეწყვეტის განხილვას ოქტომბრის შუა რიცხვებში გეგმავს.
1
s
s
s