შრომის ინსპექტირების სამსახურმა სამედიცინო პერსონალზე თანხის არათანაბარი გადანაწილებისა და შვებულება/ბიულეტენის აუნაზღაურებლობის მიმართულებით, 111 კოვიდკლინიკიდან უმრავლესობაში დარღვევები გამოავლინა. ამის შესახებ ბექა ფერაძემ განაცხადა.

იგი არ გამორიცხავს, რომ დარღვევების გამო კლინიკების ნაწილი დაჯარიმდეს.

"შრომის ინსპექციაში შემოვიდა დასაქმებულთა საჩივარი. ცხადია, არ მოვახდენ იდენტიფიცირებას, თუ რომელი კლინიკიდან მოგვმართეს, სადაც დასაქმებულთა საჩივრის წერილში მითითებული იყო, რომ არ ხდებოდა სახელმწიფოს მიერ განსაზღვრული დანამატების და სახელფასო ფონდის ანაზღაურება, ან ეს ანაზღაურება გვიანდებოდა. ორ კლინიკაზე იყო შემოსული საჩივარი, თუმცა, ჩვენ გადავწყვიტეთ ყველა კლინიკა შეგვემოწმებინა, რომელიც კლინიკის მართვაში იყო ჩართული. შემოწმებულია ყველა, 111 კოვიდკლინიკა და დარღვევები მათ აბსოლუტურ უმრავლესობაშია გამოვლენილი. თუმცა, არის საგამონაკლისო შემთხვევები, სადაც ფიქსირდება, რომ ყველა პროცედურა ცალსახად და ზედმიწევნითაა შესრულებული, რომელიც კოვიდის მართვის პროცესში იყო განსაზღვრული", - თქვა ფერაძემ.

შრომის ინსექციის სამსახურის ხელმძღვანელის ცნობით, გამოიკვეთა რიგი დარღვევები, რომელიც უკავშირდება ძირი შრომის ანაზღაურების და ასევე ხელფასის შემცირებული ოდენობით ჩარიცხვას.

"დაფიქსირდა ანაზღაურების დაგვიანების ფაქტებიც. გარდა ამისა, გამოიკვეთა, რომ ხელფასის განკარგვა და ცვლილება განხორციელდა დამსაქმებლის მხრიდან, რაც ასე არ უნდა იყოს, ვინაიდან ნებისმიერი ცვლილება შრომის კოდექსის მიხედვით, დასაქმებულთან შეთანხმებით უნდა ხდებოდეს. რამდენიმე კლინიკაში ასევე შეგვხვდა არათანაბარი მიდგომები, ვგულისხმობ პერსონალზე თანხის არათანაბრად გადანაწილებას. გარდა ამისა, იყო შვებულებასთან და ბიულეტენის აუნაზღურებლობასთან დაკავშირებული საკითხები. ეს არის ძირითადი დარღვევები, რაზეც ამ ეტაპზე შეგვიძლია აქცენტი გავაკეთოთ. დამატებით შესწავლა მიმდინარეობს. მოკვლევის საბოლოო შედეგი ოქტომბერში გამოქვეყნდება",- თქვა ფერაძემ.

წყარო: ipn.ge

Tags:

• დარღვევები
• ხელფასები
• ბექა ფერაძე
• კოვიდკლინიკები

გაზიარება

2