ახლა კი უპრეცენდენტო ამბის შესახებ გიამბობთ. რუსული ბოდიში და მიტევების თხოვნა აგვისტოს ომში დაღუპული მებრძოლის ოჯახს. მოგითხრობთ რუსეთის მოქალაქის ვალერი მარკოვისა და 2008 წლის ომში მებრძოლი, ამირან მამალაძის მშობლების შეხვედრის შესახებ. რუსული ოკუპაციის მოაქალაქეობრივი პასუხისმგებლობის გააზრება და სიმბოლური საჩუქარი ოჯახს, რომელმაც სამშობლოს დაცვისთვის ბრძოლაში 23 წლის შვილი დაკარგა. ვნახოთ ხატია გოგრაჭაძის მიერ მომზადებული სიუჟეტი.
ეს, ბოდიშია, ყველაზე სწორი და ყველაზე გულწრფელი ბოდიში რუსულ ქართულ ურთიერთობებში. რუსეთის მოქალაქე ვალერი მარკოვი, ახლა, 2008 წლის ომში დაღუპული ამირან მამალაძის ოჯახს ხვდება. ომში არასდროს ყოფილა, თუმცა, ევანგელისტური ეკლესიის წინამძღვარი ამბობს, რომ ჩრდილოელი მეზობლის ცუდი საქმეები რუსი ხალხის საერთო პასუხისმგებლობაა. ვალერი მარკოვი, აგვისტოს ომის პერიოდში, ქართველი ხალხის სოლიდარობის ნიშნად, ოკუპანტ ქვეყანაში ხმამაღლა ამბობდა, რომ თავადაც ქართველი იყო, თუმცა, 2018 წლამდე საქართველო თვალითაც არ ჰქონდა ნანახი.თავისი სწორი და ოკუპანტი ხელისუფლებისთვის მიუღებელი შეხედულების გამო, იგი საკუთარ ქვეყანაში სეპარატისტად გამოაცხადეს და მუდმივად დევნიდნენ.
ყველაფერი კი ასე დაიწყო. ვალერი მარკოვი „TV25”-ში აგვისტოს ომში დაღუპული მებრძოლის ოჯახისთვის სიმბოლური საჩუქრის გადაცემის სურვილით მოვიდა. ეს საჩუქარი, ბათუმში, ერთ-ერთი ხუთ ვარსკვლავიანი კომპლექსის აპარტამენტია. თავადაც შვილ მკვდარი მამა, ამბობს, რომ რამდენი სახლიც არ უნდა გაჩუქონ, შვილის სიკვდილით გამოწვეული ტკივილი არ ნელდება. თუმცა, როგორც თავად ამბობს ეს მცირედი საჩუქარი, იმ დიდი დანაშაულის გამოსწორების მცდელობაა, რომელიც ოკუპანტმა რუსეთმა ჩვენს ქვეყანას და ამ ოჯახებს მიაყენა.
2008 წლის ომში, აჭარიდან, 22 მეომარი დაიღუპა. რამდენიმე დღის განმავლობაში განვიხილავდით, ვის უნდა მიეღო ეს საჩუქარი. საბოლოოდ კი, მამალაძეების ოჯახი შეირჩა. შეხვედრის ადგილი, ბათუმში, დაღუპული მებრძოლის დეიდის სახლი, იმ გარემოებით გახდა, რომ ამირან მამალაძის დედა, მარინა მამალაძე, მძიმე ოპერაციის შემდგომ რეაბილიტაციას გადის და მას და უვლის. მამალაძეები, მაღალმთიან აჭარაში, სოფელ ბარათაულში ცხოვრობენ. მათი გმირი შვილიც, იქაა დაკრძალული, სადაც დაიბადა და გაიზარდა.
დამამთავრებელი კურსის სტუდენტი, ამირან მამალაძე აგვისტოს ომში, თავისი სურვილით, მოხალისედ წავიდა და გმირულად დაიღუპა. მშობლები ამბობენ, რომ 23 წლის ბიჭი გამუდმებით სახელოვან სიკვდილზე საუბრობდა.
ოჯახში, რომელიც ქვეყანას გმირებს უზრდის ახლა 5 ბავშვი იზრდება - ამირან მამალაძის ძმიშვილები. მათგან, ერთ-ერთი, გმირი ბიძიის სახელს ატარებს. ვალერი მარკოვი იმედოვნებს, რომ მამალაძეების დიდი ოჯახისთვის ეს მოულოდნელი საჩუქარი, მცირედი სიხარულის მომტანი, მაინც, იქნება.