15, მარტი 2021 16:55:00
პანდემიიდან 1 წლის შემდეგ, საქართველოში, COVID-19-ის საწინააღმდეგო ვაქცინაციის პროცესი დაიწყო. ქვეყანამ, ასტრაზენეკას 43 ათას 200 დოზა ვაქცინა შეიძინა. პირველ ეტაპზე, კოვიდსაწინააღმდეგო აცრა, სამედიცინო პერსონალს უტარდება. ვაქცინაცია დაიწყო დღეს აჭარაშიც, კერძოდ ბათუმში. 17 მარტიდან დაიწყება კოვიდსაწინააღმდეგო აცრა ქობულეთშიც, 18 მარტიდან კი, უკვე აჭარის სხვა მუნიციპალიტეტებში.
ამბავი ასეთია: კორონავირუსის გავრცელებიდან ერთი წელი გავიდა, ქვეყანაში უკვე ვაქცინა გვაქვს, თუმცა რამდენად არიან აცრის მსურველები, ეს ჯერ კიდევ საკითხავია. ამ ეტაპზე, აჭარაში მოქმედი სამედიცინო პერსონალისთვის, ვაქცინის 4 ათასი დოზაა გამოყოფილი, დღევანდელი მონაცემებით კი, რეგიონში, აცრაზე, მხოლოდ, 100-მდე მედიკოსია რეგისტრირებული. ფაქტია, რომ მზაობა საკმაოდ დაბალია. ამიტომაც, ერთ სფეროში დასაქმებულები, ერთმანეთს, აქტიურად მოუწოდებენ, რომ უნდა აიცრან.
„ვაქცინა, პანდემიის დასასრულის დასაწყისია“ - შეფასებას პროფესორი, ილია ნაკაშიძე აკეთებს. მან კოვიდსაწინააღმდეგო აცრა, დღეს, აჭარაში გაიკეთა. ანესთეზიოლოგ-რეანიმატოლოგი ამბობს, რომ ზოგადად, ვაქცინაციის ისტორია 200 წელს ითვლის და მის სანდოობაში ეჭვი არ უნდა შევიტანოთ. ნაკაშიძის თქმით, სწორედ ვაქცინაა ის, რაც ქვეყანას ახლა ყველაზე მეტად სჭირდება.
ერთ-ერთი პირველი, ვინც რეგიონში, კოვიდსაწინააღმდეგო აცრა გაიკეთა აჭარის ჯანდაცვის მინისტრია. ნინო ნიჟარაძის თქმით, აცრა, პანდემიის დასრულების ერთადერთი იარაღია. ამბობს, რომ ჯანდაცვის მსოფლიო ორგანიზაციის მიერ ავტორიზებული, ასტრაზენეკას ვაქცინა, ხარისხის, ეფექტურობისა და უსაფრთხოების ყველა სტანდარტს აკმაყოფილებს.
ჯანდაცვის მინისტრს, მოსახლეობაში გავრცელებულ ანტივაქსერულ განწყობებზეც ვკითხეთ. ნიჟარაძის შეფასებით, აცრაზე მსგავსი მიდგომები ყოველთვის იყო და ეს კონკრეტულად, ასტრაზენეკას ვაქცინას არ უკავშირდება. რა ტიპის კამპანიები აწარმოეს მოსახლეობაში, აცრაზე ცნობიერების ამაღლების მიზნით? მინისტრი ასე გვპასუხობს:
ამ ეტაპზე, საქართველოში, ასტრაზენეკას 43 ათას 200 დოზაა შემოსული. მთავრობა, დამატებით პარტიას მარტის ბოლომდე ელოდება. მათივე ცნობით, მიმდინარე თვის დასასრულს, 29 ათას 250 დოზა, ფაიზერის ვაქცინაც უნდა შემოვიდეს.