დეპუტატის შვილი, მინისტრის მოადგილის ძმა - დანიშნეს თუ არა ქობულეთის მერის მოადგილედ ლევან ზოიძე ნათესაური ნიშნით? რა ბეგრაუნდით მოვიდა მაღალ თანამდებობაზე პროფესიით ეკონომისტი ? მუნიციპალიტეტის მერი თავის მართლების პოზიციაში უკვე აღმოჩნდა.
ის, რომ ლევან ზოიძე თავის მოადგილედ დანიშნა ამას იმ გარემოებით ხსნის, რომ ახალგაზრდა კადრი სამუშაო პროცესში უფრო ეფექტური იქნება. მირიან ქათამაძე ლევან ზოიძეს დიდი ხანია იცნობს, შესაბამისად გადაწყვეტილების მიღებისას ბევრი არ უფიქრია. მიუხედავად იმისა, რომ ზოიძეს ამ მიმართულებით გამოცდილება არ აქვს, ქათამაძე დარწმუნებულია, რომ ახალი მოადგილე ბევრ საინტერესო იდეას გაუზიარებს და ერთობლივად მნიშვნელოვან პროექტებს დაგეგმავენ.
ლევან ზოიძის მამა ქობულეთის საკრებულოს დეპუტატია. ავთანდილ ზოიძე წარმომადგენლობით ორგანოში „ქართული ოცნებას“ წარმოადგენს, და თინათინ ზოიძე კი აჭარის ფინანსთა და ეკონომიკის მინისტრის მოადგილეა. თანამდებობაზე დანიშვნისას იქონია თუ არა ნათესაურმა კავშირმა გავლენა? ვკითხეთ ქობულეთის მერს, რომელმაც ეს არგუმენტი უსაფუძვლოდ მიიჩნია.
მუნიციპალიტეტის მერის მტკიცების მიუხედავად, ოპოზიცია ნეპოტიზმზე უკვე ალაპარაკდა. „ნაციონალურ მოძრაობაში“ მიაჩნიათ, რომ ლევან ზოიძე მამის და დის გავლენების გამო გახდა მაღალი თანამდებობის პირი. ბონდო თედორაძის თქმით, ასეთი მიდგომა „ქართული ოცნების“ წევრებმა კარგა ხანია, რაც დაამკვიდრეს.
ოჯახის წევრების თანამდებობრივი გავლენები უხერხულობას არ უქმნის ლევან ზოიძეს, რომელსაც ფიქრობს, რომ ნათესაური კავშირი დაწინაურებას ხელს არ უნდა უშლიდეს.
2007 წლიდან ლევან ზოიძე ბათუმის საჯარო რეესტრის ეროვნულ სააგენტოში, 2011 წლიდან კი ბათუმის იუსტიციის სახლში კოორდინატორის თანამდებობაზე მუშაობდა. 2017 წლიდან კერძო სამშენებლო კომპანიაში გადაინაცვლა. ქობულეთის მერის მოადგილედ მუშაობის შეთავაზება, როგორც თავად ამბობს მირიან ქათამაძისგან მიიღო.
ქობულეთის მერის მოადგილის მამა, ავთანდილ ზოიძე გვარწმუნებს, რომ აღნიშნულ პოსტზე შვილის დანიშვნის წინააღმდეგი იყო, რადგან მსგავსი ტიპის კრიტიკას დეპუტატი თავიდანვე ელოდა.
34 წლის ლევან ზოიძემ ბათუმის შოთა რუსთაველის სახელმწიფო უნივერსიტეტში სოციალურ-მეცნიერებათა ფაკულტეტი დაამთავრა.
1
s
s
s